2011年12月19日星期一

藍乃才+ 樊少皇的血腥cult片: 力王 (1992)

Story Of Ricky


<力王>是1992年藍乃才編導的經典血腥cult片, 改編自日本出自猿渡哲也的同名漫畫. 電影劇本與漫畫故事完全不同, 漫畫我沒看過, 所以看電影時完全沒背景, 當是一個全新概念觀看. 當年上畫時票房僅過二百萬, 佔全年華語電影第101位, 商業成績強差人意, 到今時今日仍為cult片影迷所傳頌, 受歡迎程度可算細水長流.


<力王>的賣點是漫畫式的打鬥, 誇張的血腥程度, 男人的肌肉和力量, 還有正邪的對抗, 畫面脫離現實, 天馬行空. 力王這個角色, 力大無窮, 卻又不只得一身蠻力, 還受長輩教誨, 懂得以柔克剛, 而且具備打不死之身, 根本無人是他的對手. 電影背景像黃志強的<打擂台>般是透視未來, 發生在2001年, 說資本主義國家將所有政府機關私營化, 連監獄亦被大機構包起來做生意. 今時今日已渡過2001年很久了, 該構思當然只是「吹水」.

賀力奇(樊少皇), 又稱力王, 因誤殺及襲擊罪被判入獄十年. 進監獄時, 因體內還有五顆子彈而令金屬探測器響起, 力王解釋要保留子彈是為了留個紀念. 力王被派到北倉囚禁, 同倉的老馬(曾近榮)因快將假釋而未得組長山貓(林啟榮)同意, 發生爭執, 老馬被木刨批傷鼻頭. 力王看不過眼, 把山貓絆倒, 臉部被釘板嚴重創傷.






山貓因不被力王放在眼內, 心有不甘, 串通獄警報仇. 老馬的假釋被取消, 還被屈說謊, 最後在倉內吊頸自盡. 力王望著老馬的屍體, 義憤填胸, 漸漸看到獄中有很多不平事. 獄警安排體型巨大的傻龍在浴室對付力王, 力王一拳便將傻龍打至肚穿腸爛, 以長釘接力的山貓也落得同樣下場. 力王一下子了斷了兩人, 驚動了獄警之餘, 也引來滿身紋身的北倉天王鳴海(陳治良)要向力王稍候執行家法.






力王被拘禁, 等待翌日與監獄阿頭單眼蛇(樊梅生)見面. 力王剛才被打至內傷, 竟能在拘留期間自我發功痊癒. 力王回想小時候被善鬼叔叔(丹波哲郎)傳授武功, 使他除了以一股牛力之外, 還運用氣功以柔制剛, 功力提功不少. 單眼蛇左眼盲了, 以假眼珠代替; 他的左手也有缺陷, 沒有手掌只得鐵鈎. 單眼蛇首次與力王見面毫不客氣, 雖知他易如反掌殺死傻龍和山貓, 仍以他的女友螢螢(葉蘊儀)來恐嚇. 力王怒不可遏, 出拳表示憤怒, 雖然並沒打到單眼蛇, 但拳風足以令他受傷.






北倉的囚友對老馬被害甚感不平, 找來山貓的手下百足(陳敬)洩憤. 阿廣(郭振鋒)拿起鋸齒大關刀準備劈向山貓時, 北倉天王鳴海及時出來主持公道, 並提醒只有他才能執家法. 鳴海說把百足放了, 老馬的事就此算數. 阿廣覺得鳴海身為大佬處事不公, 怨了幾句, 鳴海的啞巴乾兒子阿沙(陳國邦)示意他收聲, 卻未及鳴海手快, 以阿廣卑尊不分執行家法, 將關刀斬落他的臉上. 單眼蛇對鳴海做法讚好, 並把阿廣拖走, 打算以他作餌引誘力王出動.





為保四大天王聲譽, 鳴海與力王決一生死. 鳴海以玻璃粉灑向力王, 使他雙眼流血, 又趁他看不見時斬斷他的手筋, 廢了他右臂. 不過力王天生異稟, 打爆水喉來沖乾眼上的玻璃及血, 又自行駁手筋, 迅即回復原狀. 力王以其人之道還治其人之身, 勁拍鳴海的後腦, 令他眼珠也跌出來. 鳴海突然剖腹, 別以為他自殺, 其實只是把腸臟拿出來纏繞著力王, 力挽狂瀾, 但終被打倒死在眾人前. 另外三名天王現身, 東倉天王泰山(杉崎浩一), 南倉天王白神(黃貴雄)和西倉天王黃泉(大島由加利)鎮壓群眾, 泰山一出現便打爆囚犯的頭顱.






力王教阿沙吹音樂, 來安慰他喪義父之痛. 力王從阿沙得知, 監獄內有片罌粟田, 是天王與監獄所長的傑作, 利用囚犯為廉價勞工種植毒品. 黃泉看見阿沙向力王爆料, 把氣憤地與其他天王投訴, 召來阿沙將他的臉削下一半, 後來更將他全身剝皮棄屍在草地上. 力王為要報仇, 將罌粟田盡燒. 黃泉與力王打鬥, 本來力王遭黃泉在心臟點穴, 瀕臨死亡, 但他又能神奇地自行解穴.







白神出來幫手, 務求要消滅力王, 可惜泰山阻止白神和黃泉殺害力王, 只因他要與力王單獨決鬥. 此時, 單眼蛇命令發出零號警報, 所有囚犯都要返回獄倉. 泰山帶力王到一密室決戰, 豈料突然有大批水泥傾瀉進來, 二人身上沾滿快乾的水泥, 動彈不得, 力王被鎖上囚禁在地下室. 翌日, 監獄所長阿一(何家駒)渡假回來, 他因蠢兒子(黃國良)被紅地毯絆倒, 便要鋪地毯的囚犯失明, 橫蠻霸道.







阿一對獄內被力王翻天覆地極不滿, 得悉罌粟田被燒更是激動得心臟病發作. 力王見到阿一, 立即運勁使身上的石屎爆開, 脅持阿一. 忠心耿耿的泰山出來營救, 卻被力王一拳打爆咀和拳頭佔下風. 獄倉的天花板機關被啓動壓下來, 力王及時逃生, 但泰山則被困在內, 即使他如何忠心, 阿一見他不能收服敵人, 也毫不留情讓他被壓死.






阿一以力王不守監獄規條, 必定要嚴厲懲罰, 命令囚犯每人倒一鏟泥進坑入把力王埋下. 力王被埋在地底七天, 斷水斷糧, 只靠一枝氧氣管維生. 夜裏力王又想起螢螢不甘被輕薄跳樓自盡, 使他倍感神傷. 七天後, 阿一帶同蠢兒子和單眼蛇, 以挖泥機將力王起出, 以為這幾天又濕又冷, 他必死無疑. 誰知力王只是睡著, 使眾囚犯開心不已. 黃泉和白神又再出現, 打倒力王, 再次把他關起來對付.







力王被鋼筋鎖住, 所長及兩天王審問他的背景, 他都三緘其口, 不作任何答案. 黃泉氣極把多塊刀片塞入力王口中, 封嘴後對他拳打腳踢,後來力王把刀片及滿口血水吐在阿一臉上. 囚犯發仔每天端飯給力王, 給予他支持, 上次僥倖被放生的百足又篤背脊, 使發仔被害死. 力王把百足的頭顱打碎, 而單眼蛇的惡行一直令眾囚犯谷氣, 藉這次的冤屈氣圍毆他及把他僅有的右手也斬下來.






阿一提議減少囚犯飯菜的分量, 惹來在廚房工人埋怨, 不小心被阿一聽到他的怨言, 把他的手放進絞肉機. 眾囚犯把單眼蛇脅持到廚房, 阿一不但沒有嘗試拯救他, 還因他辦事不力釀成許多監倉內的事故, 以獵殺大象的槍射向他, 使他身體膨漲至爆破. 力王把黃泉打成廢人, 而白神也因太害怕面對力王而逃跑, 卻被阿一射爆. 阿一把蠢兒子送走, 獨自面對力王.






阿一除武功高強, 還可變身成又高又恐武有力的怪物, 力王屢次出拳打穿身體對他毫無影響, 而且越戰越強. 最後力王把阿一推入絞肉機, 把對手絞成肉醬. 力王把阿一斬頭, 把頭顱向獄卒和囚犯展示, 又一拳打破監獄的石牆, 宣佈各囚犯可以回家...







<力王>的導演藍乃才, 初期在邵氏執導, 拍過<單程路>、<城寨出來者>和<暗渠>等, 後邵氏時代的產量減少, 導演作品少於十部, 其中比較為人所熟悉的<血玫瑰>、<孔雀王子>和<阿修羅>等都不算大片. <力王>可算是他最出名的作品, 我想他當初拍成此片後都沒有想像能成為經典.

曾經聽過評語說力王這角色有如超人一樣, 全片實在「搵戲來做」, 我一直十分同意. 不過以B級片來說, 且不對劇情的合理性作任何挑戰. <力王>的欣賞要點在於打鬥的技倆和殘殺的花式實在極有創意, 而且對肉身摧毀的描寫令嗜血者尤其興奮, 港產片中難尋. 曾閱讀過一篇樊少皇的訪問, 提到在當時缺乏電腦特技的環境下, 很多血腥場面其實是以木偶代勞. 在上面的截圖中, 不難看到那些木偶的造型, 其實與真人演員的樣貌有頗大出入, 像真度甚低. 不過以成本及技術的限制下, 導演仍能傳遞想表達的概念及畫面, 已算能交到功課.

不過, 在交待劇情的手法則算粗疏, 常常出現突如其來的道具, 如山貓絆倒時的釘板, 阿廣運用的鋸齒大刀和東倉天王泰山與母親的合照等, 令人搔不著頭腦. 葉蘊儀飾演的力王女友是可有可無的章節, 對劇情可無幫助, 穿插成力王的回憶也頗為突兀.

<力王>的角色繁多, 大部分都有相當篇幅, 而且造型突出. 個人對樊梅生的單眼蛇最有深刻印象, 最喜歡他把薄荷糖放在假眼球內, 閒時取來食用. 另外飾演北倉天王鳴海的陳治良, 比樊少皇還健碩. 他原是馬來西亞藉, 曾奪亞洲健美重量級冠軍, 後來參與演出的電影為數也不少. 除了他的電影演出外, 還記得數年前他與妻子在街頭爭執, 後來因旁人搭訕而襲擊他們, 因此被捕, 後來證據不足無罪釋放, 卻足以得知他螢幕背後有火爆性格.

38 則留言:

  1. 幾年前黃百鳴拍「龍虎門」,覺得樊少皇似王小虎多過謝霆鋒,不過當年佢老哥未「low」起,無計。

    回覆刪除
  2. 孔雀王子唔算大片咩 ? 我記得當年D宣傳都好勁㗎... 果時孔雀王漫畫都好hit,又話港日合作,特技超勁等等...

    回覆刪除
  3. Gov, 我都覺得「孔雀王子」算係大片吧, 無論宣傳同製作都算係咁.話哂都係飛去日本拍, 又有幾位有名氣既日本演員...中間有一場王小鳳由人變番做妖怪果幕我覺得真係好正...係小妹兒時既十大喜愛電影之一來的..:)

    不過都係講番「力王」先,「力王」係一度我勁鐘意既cult片 :)

    鐘意在佢既戲情完全唔logic (無所謂, 反正很多日本漫畫本身就係唔logic), 特技(即係假人替身)假到無朋友, 最正既就係很夠爆力血腥...我間唔中都會再番睇...哈哈

    我在youtube都試過找日本卡通版來睇...發覺真人電影版都有9成同卡通版一模一樣的...

    回覆刪除
  4. 力王.... 一直都無緣欣賞。睇完30something嘅review就更加想睇呢套cult片王。

    樊少皇個樣真係好漫畫...眼大眉粗,同力王好鬼似。但其實各得佢幾慘,老豆從小想栽陪佢做明日武打新星,結果都係浮浮沉沉咁多年,直至做金山找至多D人識...

    30something會唔會講埋力王第二集呀 ?

    Melody, 細個睇完孔雀王子,我白痴到去記低曬元彪做果D手印...臨 兵 鬥 者..... 仲覺得自己好有型 haha

    回覆刪除
  5. Gov, yeah. 我同我堂哥都有學呀 haha
    我仲白痴哎,成日學葉藴儀碌大對眼扮變火球出黎wahaha

    回覆刪除
  6. 卡臣, 我LIKE血腥暴力cult呀

    麥昆, 多謝你留言呀! 根本王小虎同樊少皇個樣一模一樣, 哈哈! 不過, 樊少皇好少有機會做主角, 以佢武功底子同身材, 無理由同甄子丹差咁遠. 佢係一個潛力被極度低估的演員. 最近佢幕前演出多咗好多, 可能同結了婚有家庭有關, 人都積極了.

    回覆刪除
  7. Gov, 《孔雀王子》我已忘記是否製作同宣傳強勁, 睇過後不太喜歡, 印象中並非十分特別. 見你同Melody講得咁開心, 可能再找回來看看.

    《力王》有續集? 我只知另有兩套以《力王》掛帥的台灣出品, 又係樊少皇擔正. 無睇過, 不過感覺上應與此本無關.

    Melody, 《力王》特技假到無朋友係事實, 記得第一次睇就睇到笑和爆粗, 可能有戲院睇會好一點, 鏡頭快過就算. 睇碟就可以rewind, 逐格睇就會睇到好粗糙的道具和木偶

    Snail, 你同Gov都睇咁多港片, 竟然都未睇過《力王》?! 必睇呀!

    回覆刪除
  8. Melody, "碌大對眼扮變火球出黎" hahaaa 你同你堂哥都好鬼搞嘢喎... XD
    以前嘅港片真係好睇好多... 點解會咁嘅 ? 論製作同特技,雖然以前都唔覺得好“堅”,衣家睇番更加覺得佢好“流”, 不過細時又真係睇得好開心...

    回覆刪除
  9. 30something, hahaa 真係唔知點解一直冇衝動去睇〈力王〉。

    反而套戲當年正在拍攝嘅時候我有留意D news... 全因為我呀妹同我講 "樊少皇咪係〈再見媽咪〉入面識軟骨功個細路囉”,所以我好奇佢大個咗變成點 XD

    記得〈力王〉都用咗幾長嘅時間去拍,又話有人受傷,拍攝唔順利等等... 後尾我屋企移民,但係都未見〈力王〉上畫,仲以為套戲埋唔到尾添. 之後就冇再follow...

    回覆刪除
  10. Gov, 樊少皇大個咗變成點...好老實講, 唔關靚仔定醜樣, 當初見到樊少皇只覺佢個樣好怪, 可能就好似你所講, 個樣太漫畫, 唔係太似一個常人...haha

    回覆刪除
  11. .......... 睇完
    唔知講咩好, 大部份時間我都O晒咀同爆笑。
    暴力極度誇張,真係拍得住 北斗之拳....
    點解練功要喺墓地?? 仲要破壞人哋嘅墓碑 ? 真係R晒頭...
    劇情又係極度無里頭... 我冇見到曾sir同力王有講過嘢喎,點解力王對佢嘅死有咁大反應? 唔通係我miss咗...?
    十秒前仲打生打死嘅死對頭,十秒後就走去救佢。

    最爆係何家駒嘅角色... 明明有心臟病,但係又會變身喎...

    好明白點解〈力王〉只係收二百幾萬...

    順帶一提,〈力王〉係美國都好hit㗎,好多鬼佬好中意。

    回覆刪除
  12. Gov, O咀同爆笑係非常正常的反應..HAHA....戲情係極度無厘頭到爆囉...葉蘊儀果段就阿搞笑啦...俾佢走得到既時候竟然坎上天台而唔係走落街囉....真係無言...

    回覆刪除
  13. Gov, 若要在劇情中找唔合邏輯的地方,每分鐘都可能唔只一個,所以都係唔好理劇情,先享受一下荒謬的暴力!你無爆粗已經代表你接受能力比我高,哈哈!

    Melody, 你擧的例子外,仲有鳴海同力王打鬥時,自己劏肚攞條腸出來索住人,想打贏定係想輸呢,真係非一般思維可理解…

    回覆刪除
  14. 咪係囉..我第一次睇既時候以為佢好似d "架"籍人士咁切腹..點知佢係咁"新穎"囉....

    我都覺得Gov無睇到爆粗已經好勁囉...哈哈

    回覆刪除
  15. 又睇多咗次...
    呢套嘢真係.... 好鬼頂癮。

    hahaha 乜冇爆粗呀? 由力王對曾sir嘅死咁大反應果part開始,打落我差唔多每分鐘講一次 "做乜X嘢呀?"

    咁其實開頭段嘢乜乜什麼 ”2001年監獄比大機構經營”係完全冇意義可言,就算冇出段嘢對"劇情"一D影響都冇...

    葉蘊儀果段就真係...好O咀呀 ,我仲以為佢比肥佬姦咗,所以咁堅決要跳樓,我rewind睇多一次又冇見佢比人姦喎 XD

    藍乃才拍〈力王〉嘅時候係咪hi咗嘢呀 ? XD

    回覆刪除
  16. 如果有睇漫畫,[力王]有9成照搬落去
    不過樊少皇同漫畫主角都幾似粗眉眼大

    題外話:記得細個時去d鐵館做gym,個教練講
    樊梅生隔日就會親自捉樊少皇上館做gym

    所以早排d報導,佢自己講話佢老豆迫到佢緊,係堅

    回覆刪除
  17. 見同大家傾得咁高興, 我又番睇左...haha...仲係令人笑到咀都歪

    我之前搵關於力王既info時, 搵到有個人又係寫左個睇後感,好搞野

    http://blog.roodo.com/darkstar/archives/12489433.html

    我好鐘意佢last 個總結...就係當力王徒手打穿監獄既牆後叫d人走...佢既comment 係"你為什麼不一開始就打穿牆壁讓大家都回家阿" XDDDD

    回覆刪除
  18. Jeffrey, 多謝你的到訪及留言! 《力王》上映時, 樊少皇才十八、九歳, 年紀輕輕已經練到身材健碩, 一定下了不少苦功. 為人父母都係咁, 佢迫個仔都係想佢好, 只不過佢自己唔以身作則...如果佢都一齊練, 就唔使咁肥啦, 哈哈!

    Gov, Melody, 似乎你地都睇《力王》睇得好開心喎. 我當初睇時, 《力王》已經有名堂, 後來蘋果日報選個cult片五十大時, 選咗佢做第二位, 更多人認識《力王》. 不過雖然佢劇情咁唔合理, 特技咁多穿崩, 我一開始已經當佢係cult片, 而唔係爛片 XD

    回覆刪除
  19. 除左呢套之外,之後仲睇過[力王中王],[力王之真正敵人].[力王之中國拳霸],[力王之黑色檑台]
    睇完之後會問,點解樊少皇會拍呢d戲,我仲要買vcd捧場

    除左以幾套好似仲有幾套都係用力王名[掛羊頭賣狗肉]

    回覆刪除
  20. 樊少皇在內地的電視節目高歌BEYOND光輝歲月,原來他會唱歌的,好唔好聽,上網找找,品評一下@ JOHN

    回覆刪除
  21. jeffrey, 你提到的幾套都有千禧年後拍完上映, 相隔《力王》十年, 可想而知原作好耐之後才打響名堂, 開始有人用佢來掛羊頭. 若我估計無錯, 這幾部片只是普通打鬥片?

    John, 樊少皇唱《光輝歳月》唔錯喎, 比起好多所謂專業歌星還好! 好多武打明星的音樂造詣都幾好, 甄子丹識彈琴, 劉家輝識彈吉他, 樊少皇又識唱歌!

    回覆刪除
  22. 卡臣兄, 祝你聖誕快樂, 新年進步!

    回覆刪除
  23. Melody, Gov, 祝你地聖誕快樂呀! Merry Christmas to all readers too! :))))

    回覆刪除
  24. 果然是Cult片,凌晨時分看,真的一邊笑一邊爆粗,哈哈!
    30 Something,聖誕過了,預祝新年快樂啦!

    回覆刪除
  25. Snail, 也祝你新年快樂!!! :)))

    回覆刪除
  26. 30Something &各位祝你地 新年快樂!!

    回覆刪除
  27. jeffrey, 新年快樂!!!2012年快樂!!!

    回覆刪除
  28. 祝你新年快樂,分享多些好電影

    回覆刪除
  29. 《力王》乃是我最愛的本地 cult 片之一,我十分嗜看血腥暴力片,這電影的死亡/暴力方式花樣甚多,比《死神來了》系列更出色。又,其實我覺得當年的樊少皇十分靚仔。祝 新年快樂!

    回覆刪除
  30. 素顏天使, 新年快樂呀!《力王》真係嗜血者必睇, 不過穿崩之多同特技之假, 今時今日看起來忍唔住笑啫. 樊少皇十分靚仔? 只可以講男仔睇男仔, 同女仔睇男仔的觀感真係天淵之別 :)

    回覆刪除
  31. 單眼蛇樊梅生其實就係樊少皇親生爸爸黎~

    樊少皇有講當年爸爸唔俾佢拍做配角既電影, 令佢失去左好多拍電影既機會. 呢套亦係佢第一套做主角既電影, 佢本身做童星, 第一次有角色應該係姜大衛既聽不到的說話, 亦係劉青雲第一套做主角既電影. 佢有十幾年好唔得, 衰到要去菲律賓拍戲.

    力王CULT既程度真係華語片中少有, 前無古人, 我記得澳洲賣呢套力王要成$30澳幣, 受歡迎程度可見一斑

    回覆刪除
  32. 再補充少少, 其實呢套戲有好多日本演員,

    好似做泰山果一個就係當時一個幾有名既日本摔角手
    大島由加利真係唔洗講, 係前日本女子空手道冠軍
    丹波哲郎呢個香港有名既日本演員亦有客串

    大約係因為呢套電影既監制係蔡欄吧

    回覆刪除
  33. 侏儸兄, 多謝你的資料. 之前我寫過邵氏的《老爺車縱火謀殺案》裏, 有網友指出華山導演的《法網難逃》, 是樊梅生帶樊少皇拍戲的第一部. 不過我就唔知原來樊少皇去過菲律賓拍戲, 只知佢有一排好少喺香港拍戲. 你講開, 丹波哲郎客串做個角色, 真係浪費咗佢, 毫無發揮.

    回覆刪除