2013年7月30日星期二

橫掃魚蛋檔 (1982)

Interpol


在資訊並不發達的前互聯網時期, 影片的口碑只能透過報紙雜誌的影評及口耳相傳, 效率並不算高, 片名絕對是一個吸引觀眾入場看戲的原因. <橫掃魚蛋檔>絕對是個好片名, 能對觀眾對電影內容情節有無限幻想, 以為對當年時興的色情架步有深入探討; 英文片名Interpol雖然與中文片名「九唔搭八」, 但說到國際刑警, 應該必是動作槍戰連場的警匪大片吧.


相反地, 這部<橫掃魚蛋檔>低成本製作, 槍戰爆破全無, 故事鬆散不合邏緝, 最重要連點題的魚蛋檔出現不多, 更加沒有魚蛋檔被橫掃的場面. 電影裏灑了不少鹽花, 片末的動作打鬥又幾大堆頭, 應可欺騙外國觀眾, 但本地的觀眾比較精明, 當年票房二百萬不到, 在1982年不能算好.

故事講述陸正剛(黎漢持)為舞廳經理, 年青拼搏, 對搗亂份子毫不留情. 張玉玲(陳莉莉)為標記旗下的賭場荷官, 身手了得, 豪邁不凡, 為了酒樓的餐桌與有勢力人士大打出手. 兩人都因打架被送到警署問話, 促成他們二人邂逅. 及後, 正剛在玉玲的賭桌重遇, 他手風不順, 差不多輸光, 故意為難荷官, 被賭場的人教訓一頓. 玉玲把被打暈的正剛帶回家中療傷, 自始二人漸生好感, 開始拍拖.





標哥(白文彪)得知下屬玉玲與搗蛋賭客拍拖, 命令手足抯撓兩人發展. 正剛拍拖時, 巧遇失散多年的好兄弟劉文奇(陳振武). 文奇告知獲老闆程克梯(關海山)賞識, 任社團內的要職, 並邀請正剛欣賞老闆舉辦的拳賽. 標哥因為玉玲的感情生活大動肝火, 玉玲卻死不認錯, 於是標哥吩咐把玉玲賣身到程克梯旗下的蝦記的魚蛋檔接客, 又命令把正剛殺死.





文奇在賽後提醒正剛, 標哥的江湖暗殺令對他威脅極大. 正剛急於脫險, 贊成文奇的建議, 為蝦記的罪行頂包坐牢一年. 另一方面, 玉玲被賣到蝦記後, 與來自世界各地被賣身的妓女在魚蛋檔接客, 其中與一名客人司徒先生特別投契. 程克梯在外地引入的非法女移民, 打算賣到妓寨為他賺錢, 豈料在上岸一刻被警方擒獲, 見財化水, 他的親信(黃家達)懷疑社團裏有內鬼, 首先便覺得文奇有問題.





程克梯派人對付文奇, 但武功了得的文奇衝破重圍, 找到老闆質問, 何故自己對社團忠心卻換來被懷疑. 程克梯甚至想以家法侍候, 但文奇仍無懼面對, 顯示他的忠誠. 蝦記集團繼續尋求線索, 抽出獲得內部情報的人, 這時茅頭指向文玲的客人司徒先生. 文奇本身仍被懷疑, 而文奇牽引為社團頂包的正剛, 又是文玲的男友. 他們終於查探到司徒先生是國際刑警, 並將之殺害.




蝦記的另一高層(金童)將可疑的文玲和正剛都擄走, 讓老闆審問他們. 文奇原來是警方臥底, 當他發現正剛和文玲有危險, 通知警方採取行動. 程克梯不論如何拷問, 文玲與正剛都死口不認是警察, 但程拿出二人穿制服的照片, 他們再也不能否認. 此時, 蝦記的各手足向兩人窮追猛打, 正剛最後抵擋不了被重創身亡, 還被程老闆燒屍滅跡.





警方的師姐(楊盼盼)與大批警員趕到, 與蝦記的伙計赤手空拳對決, 邪不能勝正, 不少蝦記的人都被打得落花流水. 程克梯眼見處於劣勢, 被一名年輕親信帶走, 到碼頭上船欲離境. 誰知那名親信又是臥底, 他一招引君入甕, 令程克梯無處可逃, 在船上被落手扣逮捕.




此片導演陳少鵬, 七十年代拍過幾部武打片, 但<橫掃魚蛋檔>為他最後執導的電影. 在邵氏年代寫過無數劇本的司徒安為編劇, 早已流傳其實很多司徒安的作品, 只是假手於人, 加上他的名字能賣貴一點而已, 所以劇本質素非常參差. <橫掃魚蛋檔>的故事看過後令我留下不少問號, 男女主角一個是舞廳經理, 另一個是賭場荷官, 二人邂逅相識, 為何最尾突然會是警察拍檔? 正剛失散的兄弟和程克梯的親信又是警察臥底? 原來戲內角色這麼多警察, 還要坐監、賣身接客才可以讓奸人繩之於法...

<橫掃魚蛋檔>有不少動作場面, 連黎漢持和陳莉莉都要落手落腳, 不過身手非常生硬. 反而最後一幕大型打鬥, 有楊盼盼和黃家達參演, 打得比較流暢. 可是, 楊盼盼是警察, 何不用槍械解決罪犯? 認真多餘.

最近過身的黎漢持, 憑高大俊朗的外型在影視圈闖出名堂. 他拍電影的數量不多, 較集中在八十年代, 有好幾部都是由他當主角, 如靈異電影<毒蠱>和<毒咒>等. 黎漢持主力在電視圈演出, 從亞視到無視, 我印象較深反而是他在亞視主持的遊戲節目<大牌>. 他在大小銀幕息影了好幾年, 在離世前參演了即將上畫的<李碧華鬼魅系列:奇幻夜>, 成為他的遺作.

19 則留言:

  1. 你終於返嚟啦! 好嘢!

    黎漢持又幾靚仔喎,可惜離開了。

    回覆刪除
    回覆
    1. 有時間,開始寫下戲。希望仲有人睇。

      黎漢持,幾似港版秦祥林。

      刪除
  2. 30哥,點會冇人睇,等你好耐了,如果你搵個可以CAPTURE VIDEO的SOFTWARE,夾一啲短片,放上YOUTUBE,再LINK返去FACEBOOK同你的BLOGGER,可以吸引更多人流

    回覆刪除
    回覆
    1. 順叔, 你好!

      其實facebook同youtube都開了, 不過過去幾個月工作太忙, 實在無暇打理, 連個blog都荒廢咗好耐, 只因搵食要緊.

      人流多少唔大問題, 呢個blog都係興趣, 而且題材冷門, 唔係潮流嘢, 有志同道合的朋友自然會來交流下. 總之寫下舊戲, 將資料擺上網分享係我的目的...最重要係有時間寫多D.

      刪除
  3. 有網友話 當年呢套戲係因為烈火青春上唔到 先上映黎頂住

    回覆刪除
    回覆
    1. nic, 睇資料《橫掃魚蛋檔》係早大約一個星期上映, 《烈火青春》緊隨其後. 好似係因為《烈火青春》因為性愛鏡頭被電檢處被投訴及重檢, 所以《橫掃魚蛋檔》映期延長咗一日咁大把.

      刪除
  4. 我一路都有追開你既blog / facebook....望穿秋水,終於有新post
    有空請繼續寫啦~仲等緊你寫死亡監獄....^^b

    回覆刪除
    回覆
    1. Rambus, 多謝支持. 計劃咗寫幾部戲先, 希望有時間寫.

      刪除
  5. 終於等到新文章,謝謝30兄!
    之前以為自己都算熟悉港產片,拜讀閣下文章後,方發現自己的渺小。

    回覆刪除
    回覆
    1. kes, 多謝你. 小弟都好渺少...我都只係找資料總結一下, 完全唔算熟悉港產片. 有空多多指教.

      刪除
  6. 講開烈火青春…其中一場湯鎮業同葉童响電車搞嘢意識好大膽……唔知30兄有無印象?

    回覆刪除
    回覆
    1. doglam兄, 有印象. 我有寫過《烈火青春》的 :)
      http://thirty-something-hk.blogspot.hk/2010/08/1982.html

      其實, 該場戲係湯鎮業同夏文汐的...《烈火青春》裏面葉童係同哥哥一對的. 咪就係電車搞嘢呢場戲, 惹起爭論, 搞到意識過份大膽又話要禁播. 呢個爭拗都幾無謂, 大把電影比起《烈火青春》更加大膽啦...

      刪除
  7. 最近看了一套由鄭則士做恐怖片叫凌晨晚餐……唔知30兄有無印象??

    回覆刪除
    回覆
    1. 好耐之前睇過, 印象模糊, 只記得有朱寶意. 得閒重溫下先...

      刪除
  8. 30兄……呢套本身恐怖感不俗……但可惜劇本唔太惦……
    因為好多劇情交代不足……

    回覆刪除
  9. 好開心呀!!等左好耐終於有新文章啦!!!!!

    回覆刪除
    回覆
    1. 小羊你好, 好久不見. 終有新文章, 可能以後只能每個月寫一兩篇, 但都希望你有空可以多多交流!

      刪除
  10. 未到过鱼蛋档,童年时问大人,答覆总是含糊不清。

    回覆刪除