2012年4月24日星期二

被遺忘的演員: 杜少明和魚頭雲

重溫八十年代的舊香港電影, 經常會看到兩個形態相似的演員而會搞亂, 他們分別為杜少明和魚頭雲. 他們的特點是雙眼不對稱, 俗稱鬥雞眼. 在電影中, 導演編劇經常將他們雙眼的特徵誇張來當笑料, 樂此不疲.

(以上為<谷爆>內的劇照, 左為魚頭雲, 右為杜少明)

杜少明、魚頭雲和大細眼是演員而非明星, 所以有關他們的個人資料都非常有限, 但若留意該年代的電影, 會發現他們雖然只是配角, 卻出鏡率驚人. 他們除了是各自演出外, 很多電影都將兩人配對一起做對手戲, 經常有鬥雞眼對鬥雞眼的畫面. 兩人雖然都是慣常接拍搞笑電影, 多是人蠢兼手腳慢的角色, 行動笨拙, 以跌得東歪西倒、被人欺負或教訓來惹觀眾發笑. 但二人的路線其實有輕微不同: 杜少明蠢得來, 比較招積懶醒, 會扮大佬或整蠱其他人; 而魚頭雲則是徹頭徹尾地蠢, 演的全是傻仔角色.

據hkmdb的資料, 杜少明在1968年新馬師曾主演的<矇查查發達>初登大銀幕, 獲得一個小角色. 自此, 他便片約不斷, 以1978-1982這幾年間最為忙碌, 平均每年接拍十部以上的電影, 而單是1981年公映的電影, 便有19部杜少明有份演出的. 若小時候的你有收看麗的兒童節目的話, 也可能會記得杜少明曾參與<醒目仔時間>做反派人物. 杜少明活躍在七、八十年代, 之後只零星拍過幾部電影而已.



(以上為與廖偉雄和鄭則士合演<阿燦當差>的劇照, 杜少明飾演打蛇集團的成員)

魚頭雲的藝名奇怪, 有指他的本名姓劉, 有多個流傳的名字版本如劉允或劉尹, 而在<打雀英雄傳>演出時, 則介紹他叫劉穏. 魚先生體格較健壯, 七十年代中拍了多部功夫喜劇.他也與杜少明一樣, 在九十年代只作少量幕前演出.


(以上為<打雀英雄傳>的劇照)

在1978年的<谷爆>, 以取笑身體缺陷或傷殘人士為主題, 以杜少明的魚頭雲的眼睛與常人有異, 便大派用場. 杜少明飾演保鏣公司主管兼訓練員, 而魚頭雲為學員. 這部片還有一名演員大細眼, 原名宋金來, 飾演大盜. 大細眼人如其名, 兩眼大小不一, 依然以雙眼不對稱出名, 不過就並非鬥雞眼. 之後三名演員亦有不少機會合作, 如在1979年蕭榮導演, 鄧光榮和俞琤主演的<發窮惡>, 開頭十分鐘便有杜少明、魚頭雲和大細眼一起整蠱造怪, 追逐欠債的鄧光榮和作弄他們的俞琤, 結果他們都被人大打一頓.


(以上為<發窮惡>的劇照)

說到三人合作的最重戲份, 則要數到1981年的<大力小水手>. 這部以外地卡通Popeye借題發揮之作, 由韓國材、喬宏和劉雅麗分別扮演水手哥、布魯圖和愛麗絲的角色. 大細眼則演一個拿不到遺產的少爺, 身邊有幾個跟班, 包括杜少明和魚頭雲, 合力對抗水手哥等幾人. 一如所料, 杜少明和魚頭雲兩個跟班不斷撞版, 被少爺大細眼懲罰和教訓. 而他們一起把不同顏料塗在臉上, 扮鬼扮馬, 加上笨手笨腳的表現, 都是硬滑稽的技倆.






(以上為<大力小水手>的劇照)

畢竟大細眼與杜少明、魚頭雲並非完全「同類」, 所以也沒有很多機會被放在一起. 而杜少明和魚頭雲則陸續合作, 包括被譽為香港電影史上公映最短的港產片、邵氏於1982出品的<2.5cm>, 另外也有別名<街市小英雄>, 上映僅一天, 票房收入三十多萬元. 此片主腦郭煜機淪為一片導演, 電影故事圍繞幾幫街市青年, 為追女和滾軸溜冰等互相爭鬥, 內容無聊無重心, 笑料牽強, 但觀乎當年不少電影都是如此質素, <2.5cm>也不是慘淡得要一天便落畫, 實在不明所以. 杜少明和魚頭雲飾演黑太陽幫, 有主客之分, 杜生為大佬, 魚生和另一女子為隨從. 大佬為增強性能力要買各種動物的「鞭」, 為全片最好笑的橋段. 杜少明和魚頭雲最後焦頭爛額, 被警方拘捕.




(以上為<2.5cm>的劇照)

後期有些電影, 即使二人同有參演, 卻沒有對手戲, 甚至只是少戲份的配角, 如1984年桂治洪導演少有不好看的無聊喜劇<走火砲>.

(以上為<走火砲>的劇照)

在<瘋狂83>裏, 二人為顏國樑飾演的壞人區白泡的手下, 他們到醫院的破壞行動失敗, 被遺責「你們是鬥雞眼, 但不是盲的」. 在有電影接拍的日子, 杜少明和魚頭雲雖無間斷地被恥笑、揶揄甚至辱罵, 兩人的幕前表現專業, 不知攝影機背後會否感到難過.


(以上為<瘋狂83>的劇照)

杜少明和魚頭雲, 縱橫影圈超過廿年, 重覆同樣的角色, 想必是以<大力小水手>內, 大細眼訓斥二人的對白為座右銘. 所謂天生我才必有用, 他們當紥的年代, 正是港產喜劇的高峰期, 渴求他們這種外表已經能人注視的演員, 佔盡天時地利人和的優勢, 突出自己的特點而非缺點, 便成為他們受歡迎及片約不斷的原因.

因為你們的眼球都走錯了位置

不過, 你們不要自卑

這是上天給你們的特別構造

俗語說, 得天獨厚, 你知道嗎?

36 則留言:

  1. 乜2.5cm有出過碟咩? 仲有大力小水手你都有? 勁!

    回覆刪除
    回覆
    1. nic,《2.5cm》應該無出過碟...《大力小水手》都應該無卦? 有網友提供, 來源唔知喺邊, 不過《2.5cm》算幾清, 廣東話對白, 不過係部戲胡鬧, 唔算好睇.

      刪除
    2. 你竟然有 大力小水手 仲要有字幕! 海岸 VHS 係冇字幕的 …

      刪除
    3. 2.5cm咁清 會唔會係邵氏將佢收復左 但無準備出碟 而家段片流出左
      大力小水手淨係出左海岸 VHS? 不過據我所知內地(?)電視台曾經播過

      刪除
    4. 琛, nic,

      據提供者說,《2.5cm》是擷取自國內的收費視頻網, 該網現已執笠. 不過邵氏雖然無發行此電影的影碟, 但之前講過的天鷹寶盒, 是有這部戲, 而且係高清, 所以邵氏已經將此戲數碼修復咗.

      《大力小水手》係台灣VHS來的, 所以我係聽國語對白.

      刪除
  2. 以個陣票價一日收30幾萬算好好,最低記錄係一日票房收入幾百蚊.

    回覆刪除
    回覆
    1. 我估30幾萬可能係包括午夜場和優先場的票房, 所以唔清楚正式上映的一日有幾多票房. 《2.5cm》一日落畫, 對我來說好神奇, 唔知邊個可以一日決定佢落畫, 戲院又可以搵到其他電影上畫...

      刪除
    2. 當年都好多港產片排期上映 要搵片攝期應該唔難

      刪除
  3. 嘩,真係經典綠葉,尤其是杜少明,以前幾乎套套時裝都有佢。我一直以為佢哋係扮鬥雞。

    回覆刪除
    回覆
    1. Snail, 杜少明真係好多電影都有佢份, 只做配角, 應該未做過主角, 我諗佢最當旺的五年內, 拍了接近七八十部電影. 鬥雞眼...其實係咪正常唔會有, 要整對眼先會有?

      刪除
    2. 吓?!真係唔知喎。但係你睇杜少明佢對眼咁多張圖都好一致,隻右眼個幅度真係可以扮?...如果係真係五體投地,咁多年都咁連戲...

      刪除
    3. 我諗鬥雞眼係扮唔到架!應該一定是天生的,我有個朋友也是如此。

      刪除
    4. 佛爺, 我一個鬥雞眼的朋友都無, 我經常認為以前鬥雞眼的人多很多, 而家佢地唔知去哂邊.

      刪除
  4. 回覆
    1. 卡臣哥, 電影資料在網上和舊報章雜誌好多, 我只係一個資料搜集者.

      刪除
  5. "醒目仔時間"做反派人物仲有蕭山仁

    回覆刪除
    回覆
    1. celton, 多謝補充. 杜少明個樣滑稽D, 唔怕嚇親細路, 蕭山仁就成個奸人look, 佢唔講嘢都想打鑊佢.

      刪除
  6. 版主這個「被遺忘的演員」真係冇得頂,值得表揚。呢啲三四線綠葉演員真係冇幾多人識得尊重,尤其是以前師奶行街見到呢啲演員一定稱之謂「嗰個茄哩啡」,我細個反而最鍾意記住佢哋個名。

    回覆刪除
    回覆
    1. Snail, 多謝先. 只是最近時間不多, 我都想寫多點關於這些三四線演員, 尤其好多八十年代的配角演員, 真係經常出現在電影裏, 有時還會演出電視, 我自己睇番佢地好開心.

      刪除
  7. 有套'童軍樂'都好似一兩日落畫. Pom

    回覆刪除
    回覆
    1. Pom, 多謝留言.《童軍樂》後來好似在某幾間戲院延長影期, 雖然票房最後都好差...《童軍樂》失傳情況非常嚴重, 唔知點先可以睇得番...唉.

      刪除
  8. 呢2個演員,八十年代頭王晶d鐵腳
    魚頭允細個最深印象係 [比鬼捉]細個時諗
    鬥雞都可以做保安

    到唔知小學定中學d阿sir講鬥雞同正常視力一樣
    先知

    呢套印象中都好似杜少明都有演出

    回覆刪除
    回覆
    1. jeffrey, 原來鬥雞同正常視力一樣? 我而家先知. 其實杜少明同魚頭雲唔單止王晶會用, 好多中小製作都經常見到佢地, 反而大片佢地出鏡率無咁高.

      刪除
  9. 近期睇過魚頭允拍戲,應該係[機動部隊-同袍]
    做類似九龍皇帝角色

    回覆刪除
    回覆
    1. jeffrey, 多謝補充. 另外看過有網上討論說魚頭雲在2011年的TVB電視劇《真相》中, 在其中一集客串過做露體狂, 不過我就沒有看這齣劇集, 不知他現在老了樣子變成怎樣...

      刪除
  10. 30 something 仲有一個角色 係[點指兵兵]做奸角
    都係有鬥雞眼,不過唔清楚演員叫咩
    有冇留意?

    回覆刪除
    回覆
    1. jeffrey, 佢叫許炳森. 佢並非拍過好多戲, 我有留意佢喺《凶榜》的演出, 並無鬥雞眼. 所以我懷疑鬥雞眼的人正常眼睛無問題, 「需要」時先會鬥雞眼...??

      刪除
  11. 魚頭雲好似有在三度誘惑內扮綁匪。john

    回覆刪除
    回覆
    1. John, 魚頭雲應該仲參予過幾部三級片演出, 咁三級演出梗係無佢份. 香港的所謂三級情慾片其實係搞笑片...

      刪除
  12. 八十年代尾九十年代初因我姑丈跟魚頭雲頗熟, 他曾數次來我家一起吃做節晚飯, 他正職好似是電影替身

    回覆刪除
  13. yiuyiu, 多謝你報料. 唔知你而家仲有無見魚頭雲叔叔呢?

    回覆刪除
  14. 他是武師,仍然活躍電影幕後,而且身材很健壯,至於幕前演出,最近期的己是《機動部隊-同袍》,魚頭雲飾演那個山上的瘋子。

    回覆刪除
  15. 2019劉允得了金像獎,現在才知道他哥哥是白彪

    回覆刪除